Assamese Essay

অসমীয়া ৰচনা – আধুনিক সমাজৰ ব্যাধি: অনুশাসনহীনতা – অনুশাসনহীনতাৰ সম্পৰ্কে বিস্তৃত আলোচনা | The Disease of Modern Society: Lack of Discipline Essay

সময়ৰ পৰিবৰ্তন আৰু সভ্যতাৰ ক্ৰমবিকাশৰ লগে লগে পৰিবর্তন হয় সমাজ ব্যবস্থাৰ। বিজ্ঞান আৰু প্রযুক্তি বিদ্যাৰ অদ্ভুতপূর্ব উত্তৰণৰ ফলত সমাজ ব্যৱস্থাত আমূল পৰিবৰ্তনে দেখা দিছে। সেয়ে আজি বিশ্বায়নৰ যুগত পৰস্পৰাগত সমাজ ব্যৱস্থাত যি নতুনত্বৰ প্ৰভাৱ পৰিছে। সেয়ে আধুনিক সমাজ। সামাজিক ব্যাধিনো কি? আচলতে যিবোৰ কাৰকৰ বাবে সমাজ অশান্ত, অস্থিৰ আৰু বিশৃংখল হৈ পৰে; মানুহৰ জীৱনৰ গতিধাৰাত বাধাৰ সৃষ্টি কৰে; সেইবোৰেই হৈছে সামাজিক ব্যাধি। সমাজ হৈছে ব্যক্তিৰ সমষ্টি। সেয়ে সমাজ এখনক যদি এটা মানৱ শৰীৰৰ লগত তুলনা কৰা হয়, তেন্তে ইয়াৰ প্রতিজন ব্যক্তি হব সেই শৰীৰটোৰ অংগ প্রত্যংগ। শৰীৰটোৰ কোনো এটা অংগ ৰোগাক্রান্ত হ’লে যি দৰে গোটেই শৰীৰতে যন্ত্রণা অনুভূত হয়, একেদৰে সমাজৰ কোনো ব্যক্তি বিপথে গলে, কু-কর্মত লিপ্ত হ’লে তাৰ প্রভাৱ গোটেই সমাজখনতে পৰে। গতিকে সমাজখন ব্যাধিমুক্ত বা সুস্থ আৰু প্রগতিশীল হবলৈ হ’লে ইয়াৰ প্রতিজন ব্যক্তিয়েই হব লাগিব সৎ আৰু সুস্থ মানসিকতাৰ গৰাকী।আধুনিক সমাজ হৈ পৰিছে বন্ধনহীন, উন্মুক্ত সমাজ। সকলোৱে যেন বাধাহীন ভাবে স্ব-ইচ্ছাই নিজক হেৰুৱাই পেলাইছে ভোগবাদৰ লালসাত। মদ, ভাং, ড্রাগছ আদি নিচাযুক্ত সামগ্ৰীৰ অবাধ বেহা; হত্যা, লুণ্ঠন, ধর্ষণ, দুনীর্তি আদিয়ে সমাজ ছানি ধৰিছে। বৰ্বৰতাৰ সীমা চেৰাই মানুহ হৈ পৰিছে হিংসুক বন্যপ্রাণীৰ দৰে। মানুহেই মানুহৰ বাবে হৈ পৰিছে সন্ত্ৰাসৰ কাৰণ। কিশোৰ-কিশোৰী, যুৱক-যুবতী, পুৰুষ-নাৰী কোনো বাদ পৰি নোযোৱাকৈ লিপ্ত হৈছে অপৰাধ প্রৱণতাত। ভোগ বিলাস আৰু পশ্চিমীয়া সংস্কৃতিত মচগুল হৈ এচাম হৈ পৰিছে অত্যন্ত উচ্ছ্বংশল, দায়িত্বহীন আৰু বেপৰুৱা। এনে উচ্ছৃংশলতাই শিক্ষানুষ্ঠান, সাংস্কৃতিক – মঞ্চ, খেল-পথাৰ, চিনেমা গৃহ, পার্ক, ৰাজহুৱা সভা-সমিতি আদি সকলো ঠাইকে গ্রাস কৰি পেলাইছে। সমাজৰ এই অনিয়ন্ত্রিত অৱস্থাটো কৰ্কট ৰোগৰ দৰে দূৰাৰোগ্য ব্যাধি সদৃশ হৈ পৰিছে।ই সাম্প্রতিক কালৰ জটিল সামাজিক ব্যাধিৰ অনেক কাৰণ আছে যদিও ইয়াৰ মূল কাৰণ হৈছে অনুশাসনহীনতা। ‘অনুশাসন ‘শব্দটোৰ অৰ্থ ব্যাপক। আদেশ, আজ্ঞা, উপদেশ, বিধি বা নিয়ম আদি আটাইবোৰ দিশ সামৰি লয়। অনুশাসনে ব্যক্তিক সু-শৃংখলিত কৰি চৰিত্ৰবান হোৱাত সহায় কৰে। এই অনুশাসন প্রধানকৈ থাকিব লাগে নিজৰ ঘৰখনত আৰু পঢ়াশালীত। সততে কোৱা হয়- “ঘৰখনেই শিশুৰ শিক্ষাৰ কঠিয়াতলী। এটি শিশুৱে জন্ম হোৱাৰ পাছৰে পৰা প্ৰথমে নিজৰ পৰিয়ালৰ লোকসকলৰ সান্নিধ্য লাভ কৰে আৰু লাহে লাহে তেওঁলোকৰ কথা-বার্তা, আচাৰ-আচৰণ আদি অনুসৰণ কৰে। এক কথাত পৰিয়ালৰ মাজতে শিশুৰে জীৱনৰ আদি পাঠ শিকে। গতিকে ঘৰখনৰ সদস্য সকল যদি সংস্কাৰী, বিনয়ী, অধ্যৱসায়ী আৰু কর্মমুখী হয়, সেই ঘৰখনৰ শিশুও কালক্ৰমত তেনে ৰূপেই গঢ় লয়। গতিকে যি পৰিয়ালত অনুশাসন আছে, সংস্কাৰ আছে, তেনে পৰিয়ালত ডাঙৰ হোৱা শিশুৰ জীৱন সদায় সু-শৃংখল আৰু আদৰণীয় হয়। অনুশাসনৰ মেৰপাকৰ বাহিৰ হৈ কোনো শিশুৱেই বিপথে যাব নোৱাৰে বা যাবলৈ সাহস নকৰে।আধুনিক সমাজ ব্যৱস্থালৈ মন কৰিলে দেখা যায়  অধিকাংশ পিতৃ-মাতৃয়ে সন্তানৰ প্রতি নিজৰ দায়িত্ব পালন নকৰে। কর্ম ব্যস্ততাৰ বাবেই হওক বা অন্য কাৰণতে হওক নিজ পিতৃ-মাতৃয়েও সন্তানক সময় দিয়াত অপাৰগ। তাৰ পৰিৱৰ্তে হাতত তুলি দিয়ে মোবাইল ফোনটো বা টি-ভিৰ ৰিম’টটো। এনেবোৰ অভিভাৱকে সন্তানক সুখী কৰিবলৈকে বিচৰামাত্ৰকে বস্তু হাতত তুলি দিয়ে। ফলত শিশু অৱস্থাৰ পৰাই ভোগবাদী আৰু অধ্যয়ন বিমুখ হোৱাত ইন্ধন যোগায়। তেনে শিশুৱেই পিছলৈ এক উচ্ছৃংখল জীৱন যাপন কৰে আৰু ক্রমান্বয়ে অপৰাধ জগতত প্রৱেশ কৰে। বহুতো পিতৃ-মাতৃয়ে অতিমাত্রা সন্তান প্রীতিৰ বাবে সন্তানক কেতিয়াও শাসন নকৰে। তেনে শিশুৱে যি মন যায় তাকে বিনা দ্বিধাই কৰি যায় আৰু এটা বয়সত নিয়ন্ত্রণৰ বাহিৰলৈ গুচি যায়। সাম্প্রতিক কালৰ শিক্ষানুষ্ঠান সমূহতো বিভিন্ন কাৰণত অনুশাসন ব্যৱস্থা প্রায় নোহোৱাৰ দৰে হৈছে। এতিয়া ‘চেকনিৰ আগত বিদ্যা” নাই, কঠোৰ অনুশাসনো নাই। ফলত ছাত্র-ছাত্রী সকলে স্বাধীন মনেৰে, স্ব-ইচ্ছাৰে নিজক পৰিচালিত কৰিছে। কিন্তু এইটো সত্য যে উচিত-অনুশাসনৰ মাজত ডাঙৰ হোৱা আৰু শিক্ষা গ্রহণ কৰা ল’ৰা-ছোৱালী কেতিয়াও বিপথে যাব নোৱাৰে। তেওঁলোকৰ মনত থাকে ভয়, আত্মসন্মান  আৰু পৰিয়াল আৰু সমাজৰ প্রতি দায়বদ্ধতা।

সামৰণিত ক’ব লাগিব, এটি শিশুক এজন চৰিত্ৰবান আৰু সু-নাগৰিক ৰূপে গঢ়ি তুলিবৰ বাবে উচিত অনুশাসনৰ মাজত ৰাখি নৈতিক, আধ্যাত্মিক আদি সকলো দিশৰ জ্ঞানেৰে পৰিপুষ্ট কৰি তুলিবলৈ সকলো অভিভাৱক, শিক্ষক-শিক্ষয়িত্রী আৰু সমাজৰ বয়োজ্যেষ্ঠ সকল যত্নবান হোৱা উচিত। আজিৰ শিশু কাইলৈৰ নাগৰিক। গতিকে উচ্ছ্বংশল ছাত্র-ছাত্রীৰ পৰা দেশৰ মঙ্গল আশা কৰিব নোৱাৰি।

অসমীয়া ৰচনা – আধুনিক সমাজৰ ব্যাধি: অনুশাসনহীনতা – অনুশাসনহীনতাৰ সম্পৰ্কে বিস্তৃত আলোচনা | The Disease of Modern Society: Lack of Discipline Essay

For More details check our Youtube Channel Assam Board Exam

Find the list of Essays : Click Here

অসমীয়া ৰচনা – অসমৰ প্রাকৃতিক দুর্যোগ – বানপানী, ভূমিকম্প , ধুমুহা সম্পৰ্কে বিস্তৃত আলোচনা। Assamese Essay on Natural Disaster of Assam

 আৰম্ভণি:

প্রকৃতিজগতৰ বিভিন্ন উপাদানে মাজে সময়ে অস্বাভাবিক ৰূপ ধাৰণ কৰি তাণ্ডৱ বা ধ্বংস লীলা চলায়, তাকে প্রাকৃতিক দুর্যোগ বোলা হয়। প্রাকৃতিক দুর্যোগৰ পৰা পৃথিৱীৰ কোনো ঠাইয়ে মুক্ত নহয়। অসমৰ মুখ্য প্রাকৃতিক দুর্যোগ সমূহ হৈছে বানপানী, ভূমিকম্প, গৰা–খহনীয়া, ধুমুহা ইত্যাদি।

 বিৱৰণ:

অসমৰ প্রাকৃতিক দুর্যোগ সমূহৰ এটি চমু বিৱৰণ তলত দাঙি ধৰা হল

ক) বানপানী:

বানপানী অসমৰ প্রধান প্রাকৃতিক দুর্যোগ। প্রতি বছৰে বানপানীৰ ফলত অসমত বিস্তৰ ক্ষতি হয়। মানুহ আৰু জীৱজন্তৰ দুখ কোলাই-পাচিয়ে নধৰা হয়। খেতিৰ শষ্যৰ লগতে পোহনীয়া জীব-জন্তু, ঘৰ-দুৱাৰ আদি উটি-ভাঁহি যায়।

অসমৰ বানপানীৰ প্ৰধান কাৰণবোৰ হৈছে-

• ব্ৰহ্মপুত্ৰৰ উৎপত্তি স্থলত বৰফগলা,
• মৌচুমী বতাহৰ ফলত বাৰিষা কালত হোৱা ধাৰাসাৰ বৰষুণ,
• চুবুৰীয়া পাহাৰীয়া ৰাজ্যসমূহৰ পৰা বৰষুণৰ পানী অসমৰ নদী -সমূহলৈ বাগৰি অহা,
• নদী সমূহৰ ভূ-গর্ভ বাম হৈ অহা, আৰু
• অপৰিকল্পিত বান্ধ, মথাউৰি ইত্যাদি।

খ) ভূমিকম্প:

বানপানীৰ দৰে ভূমিকম্পও অসমৰ এটি উল্লেখযোগ্য প্রাকৃতিক দুর্যোগ। অসমৰ ভৌগোলিক অৱস্থান আল্পচ্ হিমালয়ান ভূঁইকপ কেন্দ্রৰ অন্তর্গত। সেয়ে মাজে সময়ে ভূমিকম্পৰ জোকাৰণিয়ে অসমৰ জন-সাধাৰণ  ত্ৰাসিত কৰি আহিছে। ১৮৩০ চনৰ পৰা অসমত অসংখ্য ভূমিকম্পৰ জোকাৰণি হৈছে। তাৰ ভিতৰত প্ৰধানকৈ চৈধ্যটাসান ডাঙৰ ভূঁইকপ হৈছে। সেইকেইটাৰ ভিতৰত ১৮৯৭ আৰু ১৯৫০ চনত হোৱা-ভূঁইকপ দুটাই বিস্তৰ ক্ষতি সাধন কৰিছিল।

গ) গৰাখহনীয়া:

গৰাখহনীয়া অসমৰ এটা ভয়াবহ প্রাকৃতিক দুর্যোগ হিচাপে পৰিগণিত হৈছে। বানপানী, অপৰিকল্পিত আৰু অবৈজ্ঞানিক ভাবে সৃষ্টি কৰা নদীবান্ধ, মথাউৰি আৰু গছ-গছনিৰ পৰিমাণ কমি অহাৰ বাবে বছৰি বহু হেক্টৰ মাটি খহি নদীৰ বুকুত জাহ গৈছে। গৰা-খহনীয়াৰ বাবে অনেক লোক গৃহহীন হ’বলগীয়া হৈছে। নদীবোৰৰ বুকু অতিকৈ বাম হৈ পৰিছে, ফলত অলপ বৰষুণতে বাৰিষা বানপানীৰ সৃষ্টি হয়। খহনীয়াৰ ফলত বিশ্বৰ ভিতৰতে বৃহত্তম নদীদ্বীপ মাজুলীৰ মাটি কালি কমি আহিছে।

ঘ) ধুমুহা:

ওপৰত উল্লিখিত দুৰ্যোগ সমূহৰ উপৰিও অসমত প্রতি বছৰে ধুমুহাই তাণ্ডব চলায়। বহাগ বিহুৰ আগে-পিছে অহা ধুমুহা বা বৰদৈচিলাই প্রতি বছৰে অসমত বিস্তৰ ক্ষতি সাধন কৰে।

সামৰণি:

প্রাকৃতিক দুর্যোগ সমূহ প্রকৃতিৰ দ্বাৰা সৃষ্ট, তাত মানুহৰ হাত নাই। সেয়ে প্রকৃতিক দুর্যোগসমূহক ৰোধ কৰিব পৰা ক্ষমতা মানুহৰ নাই। তথাপিও বুদ্ধি আৰু কৌশলৰ বলেৰে এই দুর্যোগ সমূহক কিছু পৰিমাণে নিয়ন্ত্রণ কৰিব পৰা হয় আৰু দুৰ্যোগৰ সময়ত বিস্তৰ ক্ষয়-ক্ষতিৰ পৰিমাণ হ্রাস কৰিব পৰা হয়। এই ক্ষেত্ৰত চৰকাৰে উচিত পদক্ষেপ গ্রহণ কৰি জনসাধাৰণক সজাগ আৰু সচেতন কৰি ৰাখিব লাগে।

অসমীয়া ৰচনা – অসমৰ প্রাকৃতিক দুর্যোগ – বানপানী, ভূমিকম্প , ধুমুহা সম্পৰ্কে বিস্তৃত আলোচনা। Assamese Essay on Natural Disaster of Assam

For More details check our Youtube Channel Assam Board Exam

Find the list of Essays : Click Here

অসমীয়া ৰচনা – বিজ্ঞানৰ উপকাৰিতা আৰু অপকাৰিতা – বিজ্ঞানৰ উপকাৰিতা, বিজ্ঞানৰ অপকাৰিতা, সম্পৰ্কে বিস্তৃত আলোচনা। Assamese Essay on Advantages and Disadvantages of Science Essay

আৰম্ভণি:

বিশ্বৰ সকলো কার্য, সকলো প্রক্রিয়াৰে সুসংবদ্ধ বিধি আছে, আৰু সেই প্রক্রিয়া বা বিধিৰ প্রণালীবদ্ধ জ্ঞানেই হ’ল বিজ্ঞান। বর্তমান যুগ বিজ্ঞানৰ যুগ। বিজ্ঞানে আমাৰ জীৱন পদ্ধতি, চিন্তা-চর্চা আদি সকলোতে প্রভাৱিত কৰিছে। বিজ্ঞান বাদ দি বর্তমানৰ মানুহে জীৱনৰ কোনো দিশতে খোজ দিব নোৱাৰে। ই মানৱ সভ্যতাৰ অগ্রগতিৰ অনবদ্য আহিলা। তথাপিও মানৱ প্ৰগতিৰ আহিলা হোৱাৰ সমান্তৰালভাৱে বিজ্ঞানৰ কিছুমান অপকাৰী দিশো নথকা নহয়। তলত এটি চমু বিশ্লেষণ দাঙি ধৰা হল।

 বিজ্ঞানৰ উপকাৰিতা:

বিজ্ঞান হৈছে মানৱ প্রগতিৰ মূলমন্ত্র। বিজ্ঞানৰ জয় মাত্রাই মানুহক সভ্যতাৰ চূড়ান্ত শিখৰত উপনীত কৰাইছে। গতিকে বিজ্ঞানৰ উপকাৰী দিশো সীমাহীন। বিজ্ঞানৰ বলতে মানুহে বিভিন্ন ধৰণৰ যান-বাহন, ৰেল, জাহাজ, উৰাজাহাজ আদি আৱিষ্কাৰ কৰি যাতায়াত ব্যৱস্থা অধিক সূচল কৰি তুলিলে, যাৰ ফলত গোটেই পৃথিৱীখনকে সহজে পৰিভ্রমণ কৰিব পৰা হল। যোগাযোগৰ ক্ষেত্ৰত টেলিগ্রাম, টেলিফোন, ছপাশাল, ৰেডিঅ’, টেলিভিশ্যন আদিৰ উপৰিও বর্তমান যুগৰ মোবাইল ফোন, কম্পিউটাৰ, ইন্টাৰনেট আদিয়ে মুহুর্ততে পৃথিৱীৰ যিকোনো ঠাইৰ মানুহৰ লগত যোগাযোগ সম্ভৱ কৰি তুলিছে। বিজুলি বাতিৰ আৱিষ্কাৰে গোটেই পৃথিৱী খনকে পোহৰাই তোলাৰ লগতে বিভিন্ন ধৰণৰ কল-কাৰখানা, উদ্যোগ আদি প্রতিষ্ঠা হোৱাত সহায়ক হ’ল। কৃষিৰ ক্ষেত্ৰটো অনেক যন্ত্রপাতি, কীট নাশক দ্রব্য, ৰাসায়নিক সাৰ আদিৰ আৱিষ্কাৰে মানুহৰ শ্রম লাঘৱ কৰাৰ উপৰিও উৎপাদন বৃদ্ধিত অৰিহণা যোগাইছে। চিকিৎসা বিজ্ঞানৰ অভূতপূর্ব উন্নতিৰ ফলত বহুতো দুৰাৰোগ্য ব্যাধি নিবাৰণ আৰু নিৰাময় কৰিবলৈ সক্ষম হোৱাৰ লগতে মানুহৰ গড় আয়ুস বৃদ্ধি হৈছে। তাৰোপৰি আমাৰ দৈনন্দিন জীৱনত ব্যৱহৃত আটাইবোৰ বস্তু বিজ্ঞানৰ আৱিষ্কাৰৰ ফল। ৰন্ধন গেছ, ফ্রিজ, ফেন, এয়াৰ কুলাৰ, হিটাৰ, কাপোৰ ধোঁৱা মেজিন আদি অনেক সা-সামগ্ৰীয়ে মানুহৰ জীৱন আৰাম-দায়ক আৰু উন্নত কৰি তুলিছে। এইবোৰৰ উপৰিও বিজ্ঞানে দিছে আমাক সৃষ্টিৰ তত্ত্ব, নৃতাত্বিক ঐতিহাসিক জ্ঞান, বিশ্ববিধান, দিন- ৰাতিৰ আৱিভাৱ আৰু গ্রহ-নক্ষত্ৰৰ ৰহস্যৰ সন্ধান। ৰকেটেৰে মানুহে মহাকাশত বিচৰণ কৰিছে, জোনৰ বুকুত ভৰি দিছে, আনকি অন্যান্য গ্রহৰ বুকুতো খোপনি পুতিবলৈ প্রয়াস কৰিছে। বিজ্ঞানৰ সুক্ষ্ম দৃষ্টিৰ আগত এতিয়া আৰু একো বস্তুবে অদৃশ্য হৈ থকা নাই। এই আটাইবোৰ হৈছে মানৱজাতিৰ বাবে বিজ্ঞানৰ উপকাৰী দিশ, অন্য ভাষাত বিজ্ঞান মানৱ জাতিৰ বাবে আশীর্বাদ স্বৰূপ ।

বিজ্ঞানৰ অপকাৰিতা:

বিজ্ঞানৰ উপৰোক্ত উপকাৰিতা সমূহৰ সমান্তৰালভাবে বহুতো অপকাৰী দিশো নথকা নহয়। কিছু কিছু ক্ষেত্রত বিজ্ঞান মানৱজাতিৰ বাবে হৈ পৰিছে অভিশাপ স্বৰূপ। ইয়াৰ অপকাৰী দিশবোৰে মানুহৰ মনত উদ্বেগ সৃষ্টি কৰিছে।

প্রথমতে, বিজ্ঞানৰ বলতে আজিৰ মানৱে বিভিন্ন মাৰণাস্ত আৱিষ্কাৰ কৰিছে, যিবোৰে ক্ষন্তেকতে মানৱজাতিক নিঃশেষ কৰিব পৰা ক্ষমতা আছে। দ্বিতীয় বিশ্বযুদ্ধত আমেৰিকাই এটম ব’ম নিক্ষেপ কৰি জাপানৰ দুখন চহৰ ধ্বংসস্তুপত পৰিণত কৰাটোৱে তাৰ জ্বলন্ত উদাহৰণ।

দ্বিতীয়তে, বিভিন্ন ধৰণৰ কল-কাৰখানা, গাড়ী-মটৰৰ সংখ্যা বৃদ্ধিৰ ফলত প্রকৃতিৰ ভাৰসাম্যতা হ্রাস পাইছে। মাটি, পানী, বায়ু প্রদূষণৰ লগতে গোলকীয় উষ্ণতা বৃদ্ধিৰ বাবেও পৰোক্ষভাৱে বিজ্ঞানেই অৰিহণা যোগাইছে।

তৃতীয়তে, বিজ্ঞানৰ বলতে চিকিৎসা পদ্ধতি যথেষ্ট  উন্নত হৈছে যদিও ৰোগ আৰু ৰোগীৰ সংখ্যা বৃদ্ধিৰ কাৰণো বিজ্ঞানেই। উদাহৰণ স্বৰূপে ক’ব পাৰি কৃষি পদ্ধতিত প্রয়োগ কৰা মাৰাত্মক কীটনাশক দ্রব্যৰ প্রয়োগে মানুহৰ স্বাস্থ্য, বতাহ, পানী, মাটি আদি সকলোতে ক্ষতিসাধন কৰিছে।

চতুৰ্থতে, বিজ্ঞানৰ সৃষ্টি কিছুমান বস্তু যেনে- মোবাইল ফোন, টি.ভি, কম্পিউটাৰ আদিত মানুহ অতিমাত্রা আসক্ত হৈ পৰিছে, যাৰ ফলত মানুহৰ শাৰীৰিক, মানসিক দুয়ো দিশত ক্ষতিসাধন কৰাৰ উপৰিও সময়ৰ অপব্যৱহাৰ, কর্মবিমুখ, অপাৰাধমূলক প্রবণতা বৃদ্ধি আদি কুপ্ৰভাৱে সমাজ ছানি ধৰিছে। এইবোৰৰ উপৰিও বিজ্ঞানৰ আন বহুতো অপকাৰী দিশ আছে

সামৰণি –

বিজ্ঞানে মানুহৰ আদিম অৱস্থাৰ কষ্টকৰ জীৱনৰ অৱসান ঘটাই সভ্যতাৰ জখলাত উধাবলৈ সহায় কৰিছে। ই আমাৰ জ্ঞানৰ পৰিধিৰ বিকাশ ঘটাইছে। সমাজত প্রচলিত অন্ধ-বিশ্বাস, কু-সংস্কাৰ আদি আঁতৰাই নতুন দৃষ্টিভঙ্গী গঢ়ি তোলাত সহায় কৰিছে। বিজ্ঞান এটি শক্তি মাথো। ইয়াৰ উপকাৰ আৰু অপকাৰ নিৰ্ভৰ কৰে প্ৰয়োগকাৰীৰ ইচ্ছাশক্তি আৰু জ্ঞানৰ ওপৰত। গতিকে বিজ্ঞানৰ আৱিষ্কাৰ সমূহৰ সৎ আৰু যথাযথ ব্যৱহাৰ কৰি তাৰ সুফল সমূহ গ্ৰহণ কৰিবলৈ চেষ্টা কৰাটোহে মানৱ সমাজৰ কৰণীয়।

অসমীয়া ৰচনা – বিজ্ঞানৰ উপকাৰিতা আৰু অপকাৰিতা – বিজ্ঞানৰ উপকাৰিতা, বিজ্ঞানৰ অপকাৰিতা, সম্পৰ্কে বিস্তৃত আলোচনা। Assamese Essay on Advantages and Disadvantages of Science Essay

For More details check our Youtube Channel Assam Board Exam

Find the list of Essays : Click Here

অসমীয়া ৰচনা – মোৰ জীৱনৰ লক্ষ্য – মোৰ লক্ষ্য, লক্ষ্য বাচি লোৱাৰ কাৰণ, সম্পৰ্কে বিস্তৃত আলোচনা। Assamese Essay on Aim In Life

আৰম্ভণি:

সময়ক যদি নদীৰ সোঁতৰ লগত তুলনা কৰা হয়, তেন্তে আমাৰ জীৱন এই সময় নদীত এৰি দিয়া একো-একোখন নৌকা।  আমাৰ বাবে আমাৰ জন্মই হৈছে এই কোবাল নদীৰ পাৰ, য’ৰ পৰা আমি অজান দিশে আমাৰ জীৱনযাত্রা আৰম্ভ কৰোঁ। এই যাত্ৰা বৰ খলা-বমা আৰু জটিল। সময়ৰ সোঁতক পৰাস্ত কৰি এই যাত্ৰাত সফলভাবে আগুৱাবলৈ হ’লে থাকিব লাগিব একোটা দৃঢ় মন আৰু স্থিৰ লক্ষ্য। এই লক্ষ্য ছাত্র অবস্থাতে স্থিৰ কৰিব লাগে, কিয়নো এটা নির্দ্দিষ্ট লক্ষ্য থাকিলেহে সেই লক্ষ্যৰ দিশে পূর্ণ দৃঢ়তা আৰু তীব্র বেগেৰে আগুৱাই যোৱাটো সম্ভৱ। লক্ষ্য বিহীন জীৱন বঠা নাইকীয়া নাৱৰ দৰে হয় আৰু মনুষ্য জীবন বৃথা হৈ পৰে।

মোৰ লক্ষ্যঃ

এই পৃথিৱীত মোৰ অস্তিত্বব গুৰুত্ব অনুধাৱন কৰি মই মোৰ জীৱনৰ লক্ষ্য স্থিৰ কৰিছো আৰু লক্ষ্য প্রাপ্তিৰ বাবে কঠোৰ অধ্যবসায় কৰিবলৈ প্রস্তুত হৈছোঁ। মোৰ জীৱনৰ মূল লক্ষ্য হৈছে সফল ভাৱে মোৰ শিক্ষা জীৱন সম্পূর্ণ কৰি এজন আদর্শবান নাগৰিক হোৱা আৰু মোৰ অঞ্চলৰ লগতে দেশৰ উন্নতি আৰু বিকাশৰ বাবে কাম কৰা। সমাজৰ বা দেশৰ হকে সেৱা আগবঢ়াবলৈ প্রথমে নিজক প্রতিষ্ঠা কৰিব লাগিব। সেয়ে মই স্থিৰ কৰিছোঁ যে মই এজন সু-চিকিৎসক হিচাপে প্রতিষ্ঠিত হৈ মানৱ সেৱা আগবঢ়াম। মোৰ লক্ষ্যত উপনিত হ’বৰ বাবে মই সকলো প্ৰকাৰে যত্ন কৰিবলৈ প্রতিজ্ঞাবদ্ধ।

এই লক্ষ্য বাচি লোৱাৰ কাৰণ:

মই এই লক্ষ্য বাচি লোৱাৰ কাৰণ কেইবাটাও আছে।

প্রথমতে, আমাৰ দেশত চিকিৎসা সেৱাৰ যথেষ্ট উন্নতি হৈছে যদিও গাওঁ-ভুই আদি পিচপৰা অঞ্চলসমূহত এতিয়াও যথোচিত চিকিৎসাসেৱাৰ সুবিধা নাই। বহুতো চিকিৎসকে গাওঁ অঞ্চলসমূহত সেৱা আগবঢ়াব নিবিচাৰে। মই এনে পিচপৰা অঞ্চলত সেৱা আগবঢ়াই তাৰ জনসাধাৰণক উপকৃত কৰিব বিচাৰোঁ।

দ্বিতীয়তে, অন্ধবিশ্বাস হৈছে দেশৰ প্ৰগতিৰ অন্তৰায়। আমাৰ গাওঁ অঞ্চলসমূহৰ বহুতো লোক এতিয়াও অন্ধবিশ্বাসৰ কবলত আছে, যি সকলে ৰোগ নিৰাময়ৰ বাবে চিকিৎসকৰ ওচৰলৈ নগৈ বেজ, কবিৰাজৰ ওচৰলৈ যায়। এই লোক সকলৰ মনত বিজ্ঞান সন্মত  ভাবধাৰা জগাই তুলি চিকিৎসা বিজ্ঞানৰ প্রতি ধাউতি অনাটো মোৰ কর্তব্য বুলি ভাবো।

তৃতীয়তে, আমাৰ দেশৰ বহুতো লোক এতিয়াও দৰিদ্ৰ সীমাৰেখাৰ তলত বাস কৰে। এই দৰিদ্রলোকসকলে অসুখত ভূগি যন্ত্রণাকাতৰ জীবন কটায়, অথচ টকাৰ অভাৱত চিকিৎসকৰ ওচৰ পাবগৈ নোৱাৰে। মই এনে দৰিদ্র লোকক বিনামূলীয়া চিকিৎসাসেৱা আগবঢ়াই তেওঁলোকক কিঞ্চিৎ সহায় কৰিব বিচাৰোঁ।

সামৰণি:

মোৰ জ্ঞাত যে এই লক্ষ্যত উপনীত হোৱাটো তেনেই সহজ নহয়। এজন সফল চিকিৎসক হিচাপে প্রতিষ্ঠিত হোৱালৈকে পদে পদে সন্মুখীন খ হব লাগিব বিভিন্ন জটিল পৰীক্ষাৰ। এইবোৰ অতিক্ৰম কৰি যাবলৈ মোৰ নিজৰ চেষ্টাৰ লগতে লাগিব মোৰ পিতৃ-মাতৃ আৰু শিক্ষাগুৰু সকলৰ অমূল্য আশীর্বাদ। মই যেন সকলোৰে আশীর্বাদ আৰু প্ৰেৰণা লাভ কৰি মোৰ জীৱনৰ লক্ষ্যত উপনীত হব পাৰোঁ তাৰেই কামনা কৰিলো।

অসমীয়া ৰচনা – মোৰ জীৱনৰ লক্ষ্য – মোৰ লক্ষ্য, লক্ষ্য বাচি লোৱাৰ কাৰণ, সম্পৰ্কে বিস্তৃত আলোচনা। Assamese Essay on Aim In Life

For More details check our Youtube Channel Assam Board Exam

Find the list of Essays : Click Here

অসমীয়া ৰচনা – পৰিৱেশ প্ৰদূষণ আৰু ইয়াৰ প্রতিকাৰ। প্ৰদূষণৰ কাৰণ, প্ৰভাৱ আৰু ইয়াক নিয়ন্ত্ৰণ কৰাৰ উপায় সম্পৰ্কে বিস্তৃত আলোচনা। Assamese Essay on Environmental Pollution and Its Solution

আৰম্ভণিঃ–

সমগ্র বিশ্বব্রহ্মাণ্ডৰ ভিতৰত একমাত্র পৃথিৱীতেই জীৱজগত আছে। এই জীৱজগতত তিষ্ঠি থাকিবলৈ হ’লে পৃথিৱীৰ পৰিবেশ জীৱৰ অনুকূলে থকাটো প্রয়োজনীয়। পৰিৱেশ বুলিলে সাধাৰণতে  বায়ু, পানী, মাটি, সূর্য, জলীয় বাষ্প, বিভিন্ন প্ৰকাৰৰ গেছ, উদ্ভিদ, প্রাণী এই সকলোবোৰ সু – শৃংখলিত ভাৰাসাম্যকে বুজায়। যেতিয়া বিভিন্ন কাৰণত ভাৰাসাম্য বিনষ্ট হয় বা জীৱকুলৰ ওপৰত প্রতিকূল প্রভাৱ পেলাব পৰা পৰিবর্তন ঘটে। তেতিয়াই পৰিৱেশ প্রদূষিত হোৱা বুলি ক’ব পাৰি।

প্রদূষণৰ কাৰণঃ-

আমাৰ চৌপাশৰ পৰিৱেশ মূলত দুটা কাৰণত প্রদূষিত হৈ আহিছে – প্রাকৃতিক আৰু মানৱসৃষ্ট কাৰণত। প্রাকৃতিক ভাৱে হোৱা কার্যকলাপৰ ভিতৰত বানপানী, ভূমিকম্প, ঘূর্ণীবতাহ আদিয়ে জীব-জন্তুৰ মৃত্যু ঘটোৱা, খৰাং বতৰত লগা বনজুই আদিয়েই পৰিৱেশ পদূষিত কৰে। ইয়াৰ তুলনাত মানৱসৃষ্ট বিভিন্ন কার্যকলাপে যি হাৰত পৃথিৱীৰ মাটি, পানী, বায়ু প্রদূষিত কৰিছে; সিয়েই সমস্ত জীৱকূলৰ প্রতি ভাবুকি কঢ়িয়াই আনিছে।

প্রদূষণৰ প্রকাৰ:

প্রদূষণক ঘাইকৈ তিনিটা ভাগত ভাগ কৰিব পাৰি। সেইকেইটা হল- বায়ু প্রদূষণ, পানী প্রদূষণ, মাটি প্রদূষণ। সাম্প্রতিক সময়ত এবিধ প্রদূষণে মানুহক জ্বলা-কলা খুৱাইছে, বিশেষকৈ নগৰীয়া মানুহক। সেইবিধ হল শব্দ প্রদূষণ।

আধুনিক মানৱৰ বিভিন্ন কর্মই সর্বাধিক প্ৰদূষণ কৰিছে পৃথিৱীৰ বায়ুমণ্ডলক। মানুহৰ লগতে বিভিন্ন জীৱ-জন্তু জীয়াই থাকিবলৈ বিশুদ্ধ বায়ুৰ অতি প্রয়োজন। কিন্তু মানু্হে নিজৰ জীৱনক উন্নত কৰিবলৈ প্রচেষ্টা কৰা বিভিন্ন কল – কাৰখানাৰ পৰা ওলোৱা ধোঁৱা, কাৰ্বন-মন’ অক্সাইড, ছালফাৰ – ডাই অক্সাইডৰ দৰে বিষাক্ত গেছ, জৈৱ ইন্ধন চালিত গাড়ী-মটৰৰ পৰা ওলোৱা ধোঁৱাৰ  লগত জীৱদেহৰ প্রতি ক্ষতিকাৰক গেছবোৰে বায়ুৰ প্রদূষণ ঘটাই আনিছে। মানুহে ইন্ধন হিচাপে দহন কৰা কাঠ, কয়লা, কেৰাচিন আদিবোৰেও বা্যুক দূষিত নকৰাকৈ থকা নাই। তদুপৰি যুদ্ধ-বিগ্রহত ব্যৱহাৰ কৰা বিস্ফোৰকৰ লগতে নির্গত তেজস্ক্রিয় পদাৰ্থ আদিয়েই বায়ু প্রদূষিত কৰে।

পানীক প্রাণীৰৰ প্ৰাণ বুলি কোৱা হয়। কিন্তু এই পানীও প্রদূষিত হৈছে মানুহৰ কার্ম-কলাপৰ ফলত। মানুহৰ কার্য কলাপ যেনে- উদ্যোগৰ পৰা ওলোৱা আবর্জনা, ৰাসায়নিক পদার্থ আদি নদী বা সাগৰত পেলোৱা, কৃষি  কার্যত ব্যৱহৃত ৰাসায়নিক সাৰ, কীটনাশক ঔষধৰ অতিৰিক্ত অংশ বৰষুণত উটি গৈ নদী, জান- জুৰিত মিলিত হোৱা, উদ্যোগৰ পেলনীয়া পানী আদিয়ে পানী প্রদূষিত কৰাত আগভাগ লৈছে। তদুপৰি সাগৰ-মহাসাগৰৰ পৰা খাৰুৱা তেল উদ্‌ঘাটন কৰা প্রক্রিয়াই উপকূলীয় অঞ্চলবোৰৰ পানী প্রদূষিত কৰিছে।বায়ু আৰু পানীৰ পিছতেই আটাইতকৈ প্রয়োজনীয় উপকৰণ হল মাটি। কৃষি কার্য তথা বাসস্থানৰ কাৰণে মাটি নহ’লেই নহয়। কিন্তু এই মাটি ও প্রদূষিত কৰিছে আধুনিক মানৱে। ঔদ্যোগিক আবর্জনা তথা বিষাক্ত বর্জিত পদার্থ, নগৰৰ ঘৰুৱা আৱর্জনা, কৃষি ক্ষেত্রত অত্যধিক ৰাসায়নিক সাৰ আৰু কীটনাশকৰ ব্যৱহাৰে মাটি দূষিত কৰি আহিছে। আধুনিক মানৱ ব্যৱহাৰ কৰা জৈৱ অপচনশীল প্লাষ্টিকেও মাটিৰ উবৰর্তা শক্তি হ্রাস কৰি প্রদূষণ ঘটাইছে ।

এই তিনিবিধ প্রদূষণৰ লগতে শব্দ -প্রদূষণতে নগৰীয়া মানুহক বাৰুকৈয়ে জ্বলা-কলা খুৱাইছে। গাড়ী- মটৰ ৰ হৰ্ণ; কল – কাৰখানাৰ শব্দ,জেট প্লেনৰ শব্দ আদিয়ে শব্দ প্রদূষণৰ সৃষ্টি কৰি আহিছে। সাধাৰণতে ৬৫ ডেচিবেলৰ ওপৰৰ শব্দই মানুহৰ অশান্তিৰ সৃষ্টি কৰাৰ লগতে শৰীৰৰ ক্ষতি কৰিব পাৰে।

Find the list of Essays : Click Here

প্রদূষণৰ কু-প্রভাৱ

সভ্যতাৰ চকৰিত আগুৱাবলৈ গৈ মানুহে নিজৰ ভৰিত নিজে কুঠাৰ মৰাৰ নিচিনা হৈছে। এফালে বিলাসী জীৱন-যাপন কৰিবলৈ নানা তৰহৰ বৈজ্ঞানিক আৱিষ্কাৰ  কৰিছে, আনফালে সেই আৱিষ্কাৰে মানৱ জাতিৰ ভৱিষ্যতকে বিপদৰ মুখলৈ ঠেলি দিয়ে।

প্রদূষণে মানুহৰ স্বাস্থ্যৰ ওপৰত বিৰূপ প্রভাৱ  পেলায়। বায়ু প্রদূষণৰ ফলত শ্বাস- প্রশ্বাসজনিত ৰোগ, ছালৰ কেঞ্চাৰৰ লগতে ই সৰু ল’ৰা-ছোৱালীৰ মস্তিষ্কৰ ক্ষতি কৰে।প্ৰদূষিত বায়ুৱে গোলকীয় উচ্চতা বৃদ্ধি কৰি পৃথিৱীৰ জলবায়ুৰ ব্যাপক পৰিৱর্তন ঘটাইছে। এচিড বৰষুণৰ সৃষ্টি কৰি মানৱ-সৃষ্ট অট্টালিকাসমূহৰ ক্ষতি কৰিছে। একেদৰে পানী প্রদূষণে জান-জুৰি, নদী সাগৰৰ পানী প্রদূষিত কৰি জলজ প্রাণী আৰু উদ্ভিদসমূহৰ ক্ষতি কৰে। প্রদূষিত পানীৰ দ্বাৰা  মানুহৰ টাইফয়ত, কলেৰা, বিভিন্ন পেটৰ ৰোগ, স্নায়ু ৰোগ আদি হয়।

একেদৰে মাটি প্রদূষণেও মানৱ স্বাস্থ্যৰ ওপৰত প্রভাৱ পেলাইছে। মাটিৰ স্বাভাবিক গুণাগুণ নষ্ট হোৱাৰ ফলত মাটিৰ উৰ্বৰতা হ্রাস পাইছে। উদ্যোগিক আবর্জনাসমূহ মুকলি ঠাইত পেলোৱাৰ ফলত সেই ঠাইত কৃষিৰ  উৎপাদন হ্রাস পোৱাৰ লগতে মানুহৰ তথা জীৱ-জন্তুৰ বিভিন্ন ৰোগৰ সৃষ্টি কৰিছে। সেইদৰে শব্দ-প্রদূষণৰ কু-প্রভাৱ হিচাপে মানুহৰ কানৰ নানা ৰোগৰ লগতে ৰক্তচাপ বৃদ্ধি, অনিদ্রা, স্নায়ৱিক, বিকলতা, মানসিক উত্তেজনা আদি দেখিবলৈ পোৱা যায়।

সামৰণি-

সমগ্র বিশ্বৰ কাৰণেই প্রদূষণ আজি এৰাব নোৱাৰা সমস্যা হিচাপে মূৰ দাঙি উঠিছে। মানুহৰ কেতবোৰ অবাঞ্ছিত কাৰ্য-কলাপেই প্রদূষণৰ অন্যতম কাৰক হিচাপে চিহ্নিত হৈছে। এফালে বিজ্ঞানৰ জয় যাত্ৰা আৰু আনফালে এনে জয় যাত্ৰাৰ পথত সৃষ্টি হোৱা প্রদূষণ ই চিন্তাৰ বিষয়। কিয়নো পৃথিৱীৰ  বুকুত জীৱ তিষ্ঠি থাকিবলৈ হলে প্রদূষণ মুক্ত পৰিৱেশৰ প্রয়োজন। প্রদূষণৰ পৰা হাত সাৰিবলৈ উদ্যোগ, যান-বাহন অথবা ৰাসায়নিক সাৰৰ প্রয়োগ নিষিদ্ধ কৰিব নোৱাৰি যদি ও কেতবোৰ সাবধানতা অৱলম্বন কৰি প্রদূষণৰ  পৰিমাণ হ্রাস কৰিব পাৰি। কেৱল ৫ জুন তাৰিখত সভা-সমিতি অনুষ্ঠিত কৰি এই সমস্যাক আতঁৰাব নোৱাৰি। প্রতিজন ব্যক্তিয়ে এককভাৱে প্রচেষ্ঠা হাতত ল’লেহে পৃথিৱীক পদূষণ মুক্ত কৰাটো সম্ভৱ হ’ব।

অসমীয়া ৰচনা – পৰিৱেশ প্ৰদূষণ আৰু ইয়াৰ প্রতিকাৰ। প্ৰদূষণৰ কাৰণ, প্ৰভাৱ আৰু ইয়াক নিয়ন্ত্ৰণ কৰাৰ উপায় সম্পৰ্কে বিস্তৃত আলোচনা। Assamese Essay on Environmental Pollution and Its Solution

For More details check our Youtube Channel Assam Board Exam

Find the list of Essays : Click Here