Class 10 Social Science Chapter 4 (Geography) অসমৰ ভূগোল– সমাধান in Assamese Medium|| All Question Answer
অসমৰ ভূগোল
Class 10 Social Science Chapter 4 (Geography) অসমৰ ভূগোল – Complete Question Answer in Assamese Medium
দশম শ্ৰেণী
অসমৰ ভূগোল
ভূগোল খণ্ড
২৫) অসমত কি কি মাহজাতীয় শস্যৰ খেতি কৰা হয়?
উত্তৰঃ- অসমৰ প্ৰধান মাহজাতীয় শস্যবোৰ হৈছে – মাটি মাহ, মগু মাহ, মচুৰ মাহ, মটৰ মাহ, ৰহৰ মাহ আৰু বুট মাহ।
২৬। অসমৰ ঝুম খেতিৰ বিষয়ে চমুকৈ লিখা।
উত্তৰঃ অসমৰ কাৰ্বি আংলং আৰু ডিমা হাচাও পাৰ্বত্য জিলা দুখনত ঝুম খেতি কৰা হয় কাৰ্বি আলং জিলাৰ ৫৪৫২ বর্গ কিল’মিটাৰ আৰু ডিমা হাছাও জিলাৰ ২৫৯৭ বর্গ কিল’মিটাৰ মাটিত ঝুম খেতি কৰা হয়। ঝুম খেতি সাধাৰণে জনজাতীয় লোকসকলে পাহাৰৰ এঢলীয়া মাটিত গছ গছনি কাটি চাফা কৰি পৰম্পৰাগত পদ্ধতিৰে খেতি কৰে আৰু দুই তিনি বছৰলৈ মাটিৰ উৰ্বৰতা শেষ নোহোৱালৈকে কৰি থাকে। পিছত মাটিৰ উৰ্বৰতা শক্তি হ্ৰাস পালে আন এডোখৰ ঠাই নিৰ্বাচন কৰি তাত ঝুম খেতি নতুনকৈ আৰম্ভ কৰে। ঝুম খেতি এক প্রকাৰ মিশ্রিত কৃষি যদিও ইয়াৰ পৰা ভাল উৎপাদন পোৱা নাযায়। ঝুম খেতিয়ে বননি ধ্বংস , ভূমিক্ষয় , বায়ু প্ৰদূষণ , মাটিৰ উৰ্বৰতা হ্রাস আদিৰ নিচিনা পাৰিৱেশিক সমস্যাৰ সৃষ্টি কৰে।
২৭) ২০১৪ চনৰ অসমৰ ঔদ্যোগিক আৰু বিনিয়োগ নীতিৰ প্ৰধান লক্ষ্যবোৰ কি কি?
উত্তৰঃ- ২০১৪ চনৰ অসমৰ ঔদ্যোগিক আৰু বিনিয়োগ নীতিৰ প্ৰধান লক্ষ্যবোৰ হৈছে
(ক) ৰাজ্যখনত পণ্য উৎপাদনকাৰী খণ্ড আৰু সেৱা খণ্ডৰ লগতে বিভিন্ন অৰ্থনৈতিক কাৰ্যকলাপৰ বিকাশ ঘটাই ৰাজ্যৰ মুঠ ঘৰুৱা উৎপাদন বৃদ্ধি কৰা।
(খ) ৰাজ্যখনৰ বিশেষকৈ গ্ৰাম্যাঞ্চলত জনমূৰি আয় আৰু নিয়োগৰ সুবিধা বৃদ্ধি কৰা
(গ) ৰাজ্যখনৰ অতি ক্ষুদ্ৰ ক্ষুদ্ৰ আৰু মধ্যমীয়া উদ্যোগৰ বিকাশৰ বাবে বিনিয়োগৰ পৰিমাণ বৃদ্ধি কৰা
(ঘ) বৃহৎসংখ্যক দক্ষ লোকৰ সৃষ্টি কৰা
২৮) সেৱাখণ্ডৰ উদ্যোগ বুলিলে কি বুজা? উদাহৰণ দি বুজাই লিখা।
উত্তৰঃ- অৰ্থনীতিত যিবোৰ উদ্যোগে উৎপাদিত সা-সামগ্ৰী উপভোক্তা বা গ্ৰাহকক উপলব্ধ কৰায়, সেইবোৰ খণ্ডৰ লগত জড়িত উদ্যোগক সেৱাখণ্ডৰ উদ্যোগ বোলে।
সেৱা খণ্ডৰ উদ্যোগবোৰ হৈছে – বাণিজ্য, যোগাযোগ আৰু পৰিবহণ, পৰ্যটন উদ্যোগ, হোটেল ব্যৱসায়, বেংক আৰু বীমা সকলো ধৰণৰ ব্যৱসায়, লোক প্ৰশাসন।
উদাহৰণস্বৰূপে, বাণিজ্যৰ জৰিয়তে উপভোক্তাই উৎপাদিত সামগ্ৰী পায়। যোগাযোগ আৰু পৰিবহণ ব্যৱস্থা উৎপাদিত সা-সামগ্ৰী এঠাইৰ পৰা আন এঠাইলৈ অনা নিয়া কৰাৰ লগত জড়িত।
২৯। অসমৰ প্ৰধান কৃষিভিত্তিক উদ্যোগবোৰ কি কি ?
উত্তৰঃ অসমৰ প্ৰধান কৃষিভিত্তিক উদ্যোগবোৰ হ’ল- বন উদ্যোগ, চাহ উদ্যোগ, ৰেচম উদ্যোগ, ৰবৰ উদ্যোগ, খাদ্য প্রস্তুতকৰণ উদ্যোগ, কাগজ উদ্যোগ আৰু মীন পালন, পশু পালন আদি।
৩০। অসমৰ চাহ উদ্যোগৰ বিষয়ে চমুকৈ লিখা।
উত্তৰঃ চাহ উদ্যোগ অসমৰ আটাইতকৈ বৃহৎ কৃষি ভিত্তিক উদ্যোগ। অসমৰ চাহ পৃথিৱী বিখ্যাত। অসমৰ অৰ্থনীতিত এই উদ্যোগে এক উল্লেখযোগ্য ভূমিকা পালন কৰি আহিছে। এই উদ্যোগে অসমৰ হাজাৰ হাজাৰ লােকক কর্মসংস্থান দিছে। চাহ খেতিৰ বাবে প্ৰয়োজনীয় অনুকূল প্ৰাকৃতিক পৰিৱেশৰ বাবে ৰাজ্যখনত চাহ উদ্যোগ গঢ়ি উঠিছে । অসমত প্রায় ৭৬৫ খন চাহ বাগিচা আছে আৰু ৭৮,০১১ খন সৰু চাহ বাগিচা আছে। অসমত প্রায় ৩১৮ হাজাৰ হেক্টৰ মাটিত চাহ খেতি কৰা হয় আৰু ২০১৬ চনত অসমে প্রায় ৬৬৯ হাজাৰ টন চাহ উৎপাদন কৰিছে। অসমৰ চাহ উদ্যোগত গড়ে দৈনিক ৬.৮৬ লাখতকৈও অধিক লোক নিয়োজিত হৈ আছে। ভাৰতৰ চাহ বৰ্ডৰ তথ্যমতে অসমত ক্ষুদ্ৰ চাহ খেতিয়কসকলে ৮৮ হাজাৰ হেক্টৰ মাটিত চাহ খেতি কৰে আৰু প্রায় ১০৭ হাজাৰ টন চাহ উৎপাদন কৰি আহিছে। অসমে অকলেই ভাৰতৰ মুঠ চাহ উৎপাদনৰ আধাতকৈ বেছি উৎপাদন কৰে। গােটেই ভাৰতবৰ্ষৰ ভিতৰত ৫০ শতাংশতকৈ অধিক চাহ উৎপাদন অকল অসমতে হয়। দেশৰ ভিতৰত অসমে চাহ উৎপাদনত শীর্ষস্থান দখল কৰি আহিছে।
৩১। অসমৰ মীন উদ্যোগৰ বর্তমান অবস্থা কেনেকুৱা ?
উত্তৰঃ বর্তমান সময়ত অসমৰ অর্থনৈতিক খণ্ডত মীন উদ্যোগে যথেষ্ট অগ্রগতি লাভ কৰিছে। অসমত মীন উদ্যোগৰ যথেষ্ট থল আছে। অসমত অসংখ্যা নদ – নদী , প্লাৱন ভূমি , বিল , জলাহ ভূমি আৰু পিটনি , পুখুৰী , খাল আদিৰ দৰে বহুতো নদী উপনদীৰে ভৰা য’ত যথেষ্ট পৰিমাণে মাছ পোৱা যায়। আনহাতে , ব্ৰহ্মপুত্ৰ আৰু বৰাক নদীৰ প্লাৱন ভূমিৰ জলাহ বোৰতো প্রাকৃতিকভাৱে যথেষ্ট পৰিমাণৰ মাছ পোৱা যায়। অসমত ২০১১-১২ চনৰ উপলব্ধ তথ্য অনুসৰি অনুসৰি প্রায় ৬০ হেজাৰ হেক্টৰ মাটিকালি সামৰি ৪৩০খন চৰকাৰী পঞ্জীয়নভুক্ত বিল আছে লগতে ৪০ হেজাৰ হেক্টৰ মাটিক সামৰি লোৱা প্রায় ৭৬৭ খন অপঞ্জীয়নভুক্ত অন্য বিল আছে। তদুপৰি যথেষ্ট সংখ্যক পুখুৰী , জলাহ , পিটনি , জলাশয় মৎস্যক্ষেত্ৰ হিচাপে ব্যৱহাৰ কৰিব পৰা যায়।
মুঠ ৩.৯৪ লাখ হেক্টৰ মীন উৎপাদন ক্ষেত্ৰৰ পৰা ২০১১-১২ চনত প্ৰায় ৪৪৯০ নিযুত মাছৰ পোনা উৎপাদন কৰা হৈছিল। সেই বছৰতে ৰাজ্যখনত মুঠ ২.৪৪ লাখ টন মাছ উৎপাদন কৰা হৈছিল। যোৱা ১০ বছৰত অসমত মাছৰ পোনা উৎপাদন প্ৰায় ২.৫ গুণ বৃদ্ধি হৈছে যদিও ১.৫ গুণহে মাছৰ উৎপাদন বৃদ্ধি পাইছে।
জিলা ভিত্তিত মাছৰ পোনা উৎপাদনৰ তথ্যৰ পৰা দেখা যায় ২০১১-১২ বৰ্ষত বৰপেটা জিলাই সৰ্বাধিক মাছৰ পোনা উৎপাদন কৰিছে। তাৰ পিছত কৰিমগঞ্জ আৰু নগাঁও জিলাত অধিক মাছৰ পোনা উৎপাদন হৈছে। সেইদৰে মৎস্য উৎপাদনত নগাঁও জিলা প্ৰথম, কাছাৰ আৰু ধুবুৰী জিলা দ্বিতীয় আৰু তৃতীয় স্থানত আছে
অসমৰ মীন উদ্যোগ খণ্ডই ৰাজ্যখনৰ ঘৰুৱা উৎপাদনত আশা কৰা ধৰণে বিশেষ অৰিহণা যোগাব পৰা নাই। এই পৰ্যন্ত ৰাজ্যখনৰ মুঠ ঘৰুৱা উৎপাদনত মীন উদ্যোগ খণ্ডই কেৱল দুই শতাংশ অৱদান আগবঢ়াইছে। প্ৰচুৰ সম্ভাৱনা থকা সত্ত্বেও অসমত মাছ উৎপাদন তেনেই সন্তোষজনক নহয়। অসমে বৰ্তমান বাহিৰৰ পৰা বছৰি ০.২০ লাখ টন মাছ ৰপ্তানি কৰে। ৰাজ্যখনত বছৰি ০.৫২ লাখ টন মাছৰ নাটনি হয়। সেয়েহে অসমত মাছৰ দাম অধিক হাৰত বৃদ্ধি পাবলৈ ধৰিছে।
৩২) অসমৰ কৃষি উন্নয়নৰ সমস্যাবোৰ উল্লেখ কৰা?
উত্তৰঃ-অসমৰ কৃষি উন্নয়নৰ সমস্যাবোৰ হৈছে
(ক) অসমৰ সমভূমি অঞ্চলত পৰম্পৰাগত কৃষি আৰু পাহাৰীয়া অঞ্চলত ঝুম খেতি এতিয়াও পৰম্পৰাগতভাৱে পুৰণি পদ্ধতিৰে চলি আছে।
(খ) অসমৰ খেতিয়কসকলৰ খেতি মাটি সাধাৰণতে সৰু সৰু খণ্ডত বিভক্ত হোৱাৰ বাবে সেইবোৰত আধুনিক কৃষি সঁজুলি আৰু কৌশল প্ৰয়োগ কৰিবলৈ অসুবিধা।
(গ) জলসিঞ্চন পদ্ধতি উন্নত নহয় আৰু জলসিঞ্চনৰ সুবিধা পৰ্যাপ্ত নহয়।
(ঘ) বানপানী আৰু গৰাখহনীয়াৰ দ্বাৰা অসমৰ কৃষি ক্ষতিগ্ৰস্ত হৈছে। ৰাজ্যখনৰ মুঠ খেতি কৰা মাটিৰ ২৫ শতাংশতকৈও অধিক মাটিৰ শস্য বছৰী বানপানীয়ে নষ্ট কৰে আৰু গৰাখহনীয়াৰ ফলত প্ৰতি বছৰে বুজন পৰিমাণৰ সাৰুৱা মাটি নদীৰ বুকুত জাহ গৈছে।
(ঙ) খৰাং বতৰৰ বাবে ক্ষতিগ্ৰস্ত হোৱা কৃষিকাৰ্যৰ লগতে কৃষকসকলক সুৰক্ষা দিবলৈ উপযুক্ত কৃষি পৰিকল্পনাৰ অভাৱ।
(চ) শস্যৰ সুৰক্ষা ব্যৱস্থা আৰু শস্য চপোৱাৰ পদ্ধতি উন্নত নহয়।
(ছ) শস্য বিশেষকৈ খাদ্য শস্য সংৰক্ষণৰ সুবিধা অতি সীমিত।
(জ) কৃষকে উৎপন্ন কৰা শস্যৰ উচিত মূল্য কৃষকে প্ৰত্যক্ষভাৱে লাভ কৰিব পৰা ব্যৱস্থা নোহোৱাৰ ফলত কৃষকসকল আৰ্থিকভাৱে দুৰ্বল হৈ আছে।
(ঝ) কৃষকসকলে উন্নত মানৰ বীজ, প্ৰয়োজনীয় সাৰ, কৃষি সঁজুলি আৰু কৃষি ঋণ ৰেহাই হাৰত সহজে পাব পৰা ব্যৱস্থাৰ অভাৱ।
(ঞ) কৃষি যান্ত্ৰিকীকৰণৰ ক্ষেত্ৰত তুলনামূলকভাৱে কম খৰচী বিজুলী শক্তিৰ ব্যৱহাৰ তেনেই সীমিত হৈ আছে।
(ট) কৃষি উন্নতিৰ বাবে ৰাজ্যখনত সামগ্ৰিক আন্তঃগাঁঠনিৰ অভাৱ।
৩৩। অসমৰ ঔদ্যোগিক বিকাশ এতিয়াও কিয় মন্থৰ হৈ আছে তাৰ কাৰণসমূহ লিখা।
উত্তৰঃ অসমৰ ঔদ্যোগিক বিকাশ মন্থৰ হৈ থকাৰ প্ৰধান কাৰণসমূহ হৈছেঃ
(ক ) ৰাজ্যখনৰ প্রাকৃতিক সম্পদসমূহৰ উপযুক্ত ব্যৱহাৰৰ জৰিয়তে ঔদ্যোগিক উন্নয়ন সাধন কৰিবলৈ সর্বাত্মক তথা সুসংহত পৰিকল্পনাৰ অভাৱ।
(খ) প্ৰচুৰ সম্ভাৱনা থকা সত্ত্বেও কৃষিভিত্তিক উদ্যোগ খণ্ডৰ সীমিত আৰু লেহেমীয়া বিকাশ
(গ) অনুন্নত পৰিবহন আৰু যোগাযোগ ব্যৱস্থা
(ঘ) মূলধনৰ অভাৱ
(ঙ) ৰাজ্যখনত শক্তিৰ চাহিদা অনুপাতে ইয়াৰ যোগান আৰু বিতৰণ নিয়মীয়া আৰু পৰ্যাপ্ত নহয়
(চ) স্থানীয় লোকৰ মাজত উদ্যোগী স্পৃহা বঢ়াবলৈ উপযুক্ত পৰিকল্পনাৰ অভাৱ
(ছ) উদ্যোগ স্থাপনৰ বাবে সৰল আৰু শিথিল উদ্যোগ নীতিৰ অভাৱ
(জ) বিনিয়োগ সন্তুোষজনক নহয়, বিশেষকৈ ৰাজ্যখনত উদ্ভৱ হোৱা বিদ্ৰোহী সমস্যাৰ বাবে অসমত বিনিয়োগ কৰিবলৈ বাহিৰৰ বিনিয়োগকাৰীসকল আগ্ৰহী নহয়।
৩৪) অসমৰ পৰ্যটন উদ্যোগৰ সমস্যাবোৰ উল্লেখ কৰা।
উত্তৰঃ- ৰাজ্যখনত প্ৰচুৰ সম্ভাৱনা থকা সত্ত্বেও পৰ্যটন খণ্ডত এই পৰ্যন্ত আশানুৰূপ উন্নয়ন নোহোৱাৰ কাৰণসমূহ হৈছে 一
i) অনুন্নত পৰিবহন ব্যৱস্থাঃ-অনুন্নত পৰিৱহণ ব্যৱস্থাৰ বাবে প্ৰচুৰ সম্ভাৱনা থকা সত্ত্বেও পৰ্যটন খণ্ডত এই পৰ্যন্ত আশানুৰূপ উন্নয়ন হোৱা নাই। অসমৰ বহুতো পৰ্যটন স্থলী লৈ যাবলৈ আজি পৰ্যন্ত সুগম বাট- পথৰ ব্যৱস্থা হোৱা নাই। প্ৰায় বিলাক পৰ্যটন স্থলীত কেৱল পথ পৰিবহন ব্যৱস্থাহে উপলব্ধ। ৰে’ল পথ বা আকাশীপথেৰে এতিয়াও সেইবোৰলৈ যাব পৰা অৱস্থা হোৱা নাই।
ii) পৰ্যটনস্থলীৰ দুৰ্বল আন্তঃগাঁথনিঃ- পৰ্যটন উদ্যোগটোৰ ভালদৰে বিকাশ নোহোৱাৰ অন্য এক কাৰণ হৈছে – পৰ্যটনস্থলীৰ আশে-পাশে পৰ্যাপ্ত পৰিমাণে থকা খোৱা, শুৱাৰ ভাল ব্যৱস্থাৰ বাবে হোটেল, ৰেস্তোৰা আদিৰ অভাৱ ǀ
iii) বিদেশী পৰ্যটকক আকৰ্ষণ কৰিব পৰা পৰিৱেশৰ অভাৱঃ-অসমত থকা পৰ্যটনস্থলীৰ সম্পৰ্কে বাতৰি-কাকত বা কোনো বৈদ্যুতিক মাধ্যমসমূহত বিজ্ঞাপন খুব কম পৰিমাণে প্ৰকাশ পায়। যাৰ ফলত বাহিৰৰ পৰ্যটকসকলে অসমত উপলব্ধ পৰ্যটনস্থলীৰ সম্পৰ্কে জ্ঞাত নহয় যাৰ ফলত এই উদ্যোগৰ বিকাশ ভৱা মতে হোৱা নাই।
iv) অপৰ্যাপ্ত মূলধন বিনিয়োগঃ- বিশেষকৈ ৰাজ্যখনত উদ্ভৱ হোৱা বিদ্ৰোহী সমস্যাৰ বাবে অসমত বিনিয়োগ কৰিবলৈ বাহিৰৰ বিনিয়োগকাৰীসকল আগ্ৰহী নহয়। যাৰ ফলত ৰাজ্যখনত প্ৰচুৰ সম্ভাৱনা থকা সত্ত্বেও পৰ্যটন খণ্ডত এই পৰ্যন্ত আশানুৰূপ উন্নয়ন হোৱা নাই।
৩৫) অসমৰ অৰ্থনৈতিক উন্নয়নৰ সম্ভাৱনাবোৰ কি কি?
উত্তৰঃ- স্বাধীনতাৰ আগলৈকে অসমত চাহ উদ্যোগ আৰু ডিগবৈ তেল উদ্যোগটোৰ বাহিৰে বিশেষ কোনো উদ্যোগ নাছিল। কিন্তু যোৱা তিনিটা দশকত ৰাজ্যখনত উদ্যোগীকৰণৰ বাবে প্ৰয়োজনীয় আন্তঃগাঠনি উন্নত কৰিবলৈ প্ৰচেষ্টা হাতত লোৱা হৈছে। তাৰ ফলস্বৰূপে ন ন উদ্যোগ গঢ়ি উঠিছে। এই উদ্যোগসমূহৰ ভিতৰত তেল শোধনাগাৰ, পেট্ৰ’ৰাসায়নিক উদ্যোগ, সাৰ কাৰখানা, কাগজ কল, চিমেন্ট উদ্যোগ, চেনী কল, কপাহ উদ্যোগ, মৰাপাট কল আদিয়ে প্ৰধান। বৰ্তমান অসমত ১০০ তকৈও অধিক মধ্যমীয়া বিধৰ আৰু ১৭,৫০০ টা সৰু উদ্যোগ আছে। আনহাতে, হস্ততাঁত আৰু হস্তশিল্পৰ ক্ষেত্ৰত অসম আগবঢ়া। মুগা সূতাৰ উৎপাদন অসমৰ এটা একচেটীয়া উদ্যোগ। পাটশিল্প, বাঁহ-বেতৰ শিল্প, কাঁহ-পিতলৰ শিল্পৰ ক্ষেত্ৰত অসমত এই পৰ্যন্ত উপযুক্ত বজাৰ গঢ়ি উঠা নাই। এইবিলাকত পৰ্যাপ্ত মূলধন বিনিয়োগ হোৱা নাই। চৰকাৰৰ অনিদ্দা আৰু সদিচ্ছাৰ অভাৱত অসমত আজিও স্থানীয় শিল্পজাত সামগ্ৰীয়ে বাহিৰৰ পৰা অহা শিল্পজাত সামগ্ৰীৰ সৈতে ফেৰ মাৰিবলগীয়া হয়। অন্যথা এই হস্তশিল্পজাত সামগ্ৰীয়ে অসমৰ মান বিশ্বত প্ৰতিষ্ঠা কৰিবলৈ সক্ষম হ’ল হয়।
ঠিক তেনেদৰে খনিজ সম্পদতো অসম এখন চহকী ৰাজ্য। খনিজ সম্পদৰাজীৰ পৰা অসমে ভালেখিনি ৰাজহ লাভ কৰে। বনজ সম্পদতো অসমখন চহকী। অসমৰ হাবিত উপলব্ধ বাঁহ, বেত, খেৰ, খৰি, বিল, খালৰ মৎস্য সম্পদৰ পৰা আৰু নদীৰ বুকুত শিল-বালিৰ পৰা অজস্ৰ ৰাজহ লাভ কৰে। পৰ্যটন উদ্যোগটোৰো অসমত যথেষ্ট সম্ভাৱনা লুকাই আছে। সুবিধাজনক যাতায়ত আৰু যোগাযোগ ব্যৱস্থা, বিজ্ঞাপন আদিৰ জৰিয়তে এই উদ্যোগটোৰ বিকাশ সাধন কৰিব পাৰি। ভূমি আৰু জলসম্পদতো অসমখন চহকী ৰাজ্য। কিন্তু মাটিৰ গুণাগুণৰ ভিত্তিত উপযুক্ত ভূমি ব্যৱহাৰৰ পৰিকল্পনা এতিয়াও হোৱা নাই। অসমৰ ব্ৰহ্মপুত্ৰ, বৰাক আৰু ইহঁতৰ উপনৈৰ প্ৰচুৰ জলসম্পদ বৰ্তমানলৈকে আশাপ্ৰদভাৱে ব্যৱহাৰ হোৱা নাই। উপযুক্ত পৰিকল্পনাৰে অসমৰ জলসম্পদ, কৃষি, উদ্যোগ, শক্তি আৰু পৰিবহন খণ্ডত ব্যৱহাৰ কৰিলে তাৰ পৰা ৰাজ্যখনৰ অৰ্থনৈতিক বিকাশ তৰাম্বিত হ’ব বুলি আশা কৰিব পাৰি।
ভাৰতবৰ্ষৰ অন্য ৰাজ্যৰ দৰে অসমতো মানৱ সম্পদ উন্নয়নৰ প্ৰচুৰ সম্ভাৱনা আছে। অসমৰ জনসংখ্যাৰ বৃত্তিগত বৈশিষ্ট্য লক্ষ্য কৰিলে দেখা যায় যে, প্ৰথমিক বৃত্তিৰ বাহিৰে দ্বিতীয়ক, তৃতীয়ক আৰু চতুৰ্থক খণ্ডত ৰাজ্যখনে বিশেষ অগ্ৰগতি লাভ কৰিব পৰা নাই। ৰাজ্যখনৰ বৃহৎ জনসংখ্যাৰ কৰ্মদক্ষতা বৃদ্ধি কৰি অৰ্থনৈতিক খণ্ডসমূহত নিয়োগৰ ব্যৱস্থা কৰিব পাৰিলেহে মানৱ সম্পদৰ উন্নতি আশা কৰিব পাৰি। ইয়াৰ উপৰিও জনসাধাৰণৰ দুৰ্বল শ্ৰেণীৰ লোক, বিশেষকৈ দৰিদ্ৰ, অক্ষম আৰু মহিলাসকলক উপযুক্তভাৱে সৱলীকৰণ কৰিব লাগিব। কেৱল অৰ্থনৈতিক উন্নতিৰ নামত প্ৰাকৃতিক সম্পদৰাজী অবিবেচকভাৱে ব্যৱহাৰ কৰিলে এটা সময়ত এইবোৰ নোহোৱা হৈ গ’লে তাৰ কু-ফল জণগণে ভোগ কৰিব লাগিব।
Class 10 Social Science All Question Answer- Click Here
Class 10 Social Science Chapter 4 ( Geography) অসমৰ ভূগোল – Complete Question Answer in Assamese Medium
For More details check our Youtube Channel Assam Board Exam
